Ek voeg my stem by Hoffie Hofmeyr. In Openbare regstelling soos vereis deur ondersoekliggaam van die Ring van Johannesburg maak André Bartlett sogenaamd verskoning, maar ten spyte van die feit dat hy skuldig bevind is aan leuens, kom niks daarvan na vore in sy verskoning nie.

‘n Mens het meer verwag…

********

André Bartlett, doen selfondersoek | Netwerk24

Deur Prof. Hoffie Hofmeyr, Emeritus, Universiteit Van Pretoria

30 Junie 2021

André, hoewel ons nie naby-vriende is nie, ken ek jou in verskillende verbande en veral jou skoonfamilie taamlik goed, selfs uit die 1960’s. Ek ken ook die meeste van die rolspelers in die onlangse kerklike ondersoeke na jou uitsprake en rol gedurende die laaste jare taamlik goed.

Ek gaan nie hier standpunt inneem oor die gay-kwessie of met jou in ’n twisgesprek betrokke raak nie, maar bloot in groot opregtheid by jou as my broer in Christus vir die volgende pleit:

Hoewel jy aan slegs een van die vyf klagte in ’n hopelik liefdevolle kerklike ondersoek (want dit is wat ’n korrekte benadering tot kerklike ondersoeke behoort te wees) skuldig bevind is, aanvaar dat dit wel op die ernstigste van die klagte is, naamlik dat jy valse getuienis oftewel ’n leuen versprei het. Jy is op hierdie ernstigste klag ook aan al die subklagte skuldig bevind.

Probeer om nie hierdie skuldigbevinding te onderskat soos wat jy in die pas verskene Rapport-onderhoud probeer doen het nie. Aanvaar dat in hierdie waarskynlik baie deeglike ondersoek vanweë die sensitiwiteit daarvan, die klagte bo alle twyfel bewys is.

Jy is, soos dit hoort, in die kerklike ondersoek-vergadering en ook deur die toesigliggaam oor jou, naamlik jou ring, in liefde oor jou woorde en dade aangespreek.

Aanvaar dat jy skade berokken het aan baie sake: aan die Koninkryk, aan die kerk van Christus, aan die NG Kerk en veral die Hoëveld-Sinode, waarvan jy voorsitter is. Selfs ook aan die gay-saak, waarvoor jy jou beywer, en les bes aan die fakulteit teologie van die Universiteit van Pretoria waar jy as predikant verantwoordelik vir bedieningsontwikkeling betrokke is.

Eintlik hoef ek die volgende nie vir jou uit te stippel nie, maar ek herinner jou maar net aan die praktiese implikasies:

• Dat jy, as jy dit nog nie vroeër gedoen het nie, tot ernstige selfondersoek sal kom;
• Dat jy om vergifnis sal pleit by veral dr. Chris van Wyk, aan wie se person, maar ook as kerkleier en moderator in die Oos-Kaap en as lid van die algemene sinode se moderamen, jy baie groot skade berokken het met baie bewerings, ook dat hy met haatspraak besig is;
• Dat jy met hom tot versoening sal kom; ) Dat jy sal toesien dat die klag wat by die Menseregtekommissie moontlik deur jou toedoen aanhangig gemaak is, teruggetrek sal word; en
• Dat jy en jou geesgenote die pad van ernstige regstelling sal loop deur miskien met minder voortvarendheid jul roeping te vervul.

My hoop en gebed is dat hierdie tragiese verhaal en pynlike lesse uit die onlangse geskiedenis van die NGK deur jou, deur die kerkleiding en deur die breë kerk met baie groot erns bejeën sal word, maar ook ná opregte en selfs openbare versoening spoedig begrawe sal word. En dat die Koninkryk wat baie seergekry het, opnuut gedien sal word.