*******

Is LGBTQIA+, liberale teologie nuwe fokuspunt? | Netwerk24

Dr. Bernhard Ficker, Somerset-Wes

29 November 2024

Die skrywe van prof. Nelus Niemandt “Smeerveldtog teen hierdie teologie-dosente” (26.11) het my laat kopkrap, want dit verskaf geen opheldering rakende die kwessie van die betrokke dosent nie.

Niemandt maak beswaar teen Philip Coetzee (12.11) se skrywe wat ’n “enkele sin uit ’n proefskrif” aanhaal wat deur ’n teologiesedosent verbonde aan Hugenote Kollege geskryf is. Nee, prof. Niemandt, dit was nie ’n enkele sin nie, maar wel twee sinne waarna verwys is. Coetzee verwys na mense wat die Bybel voorstel as ’n boek vol strydighede en mensgemaakte ideologie.

In die eerste sin stel hierdie doktorale skrywer dit onomwonde dat die Nuwe Testament in sy geheel nie feitelik korrek is nie, maar moontlike versinsels of “pessimistiese begrippe van ’n skrywer om soteriologiese oortuiging te akkommodeer”.

In die tweede aanhaling noem hy die skrywer in die Nuwe Testament is “beïnvloed deur aspekte van dualistiese wêreldbeskouings”, byvoorbeeld die briewe van Paulus. As hierdie skrywes die sieninge van ’n teologiedosent by Hugenote Kollege verteenwoordig, dan is daar ernstige probleme.

Hoekom verskaf Niemandt nie aan ons die titel van die proefskrif sodat ons self al die ander sinne kan gaan lees en sien presies wat aangaan en presies watter dwaalleer propageer word deur hierdie dosent nie?

Ek het na die kollege se webwerf gegaan om verdere inligting te probeer verkry. Daar het ek egter gelees hoe Hugenote Kollege op 26 Oktober ’n groot straatoptog gehou het om LGBTQIA+-aktiwiteite te bevorder.[1] Is LGBTQIA+ nou Hugenote Kollege se nuwe fokuspunt, tesame met sy liberale teologie?

Voetnotas

[1] Die volgende het op 29 Oktober 2024 op Hugenote-Kollege se Facebookblad verskyn:

We are excited to share that our community engagement event on October 26th was a success! Together, we marched down Church Street to raise awareness about Gender-Based Violence (GBV) and the LGBTQIA+ community.

The energy was incredible, and the event truly sparked important conversations. As we walked, we could hear people along the sidewalk asking about the LGBTQIA community, opening the door to reducing ignorance and fostering understanding. The sight of the pride flags prompted questions and curiosity, with challenging interactions that presented the opportunity to educate and inform.

A heartfelt thank you to our partners-Drakenstein Municipality, Norsa Community Care, Badisa Wellington, DSD, and Gender Dynamix-for their support and collaboration.