Kyk ook:
Betekenis
Jakob se hand het aan Esau se hakskeen vasgehou toe hy gebore is en daarom is hy Jakob genoem (Gen 25:26). Die naam Jakob (Ya’akov) herinner aan die Hebreeuse woord vir “hakskeen” (akev).
Toe Jakob vir Esau bedrieg het deur sy seën te vat, het Esau gesê dat Jakob tereg Jakob genoem word (Gen 27:36). Dit is omdat die naam “Jakob” baie naby aan die Hebreeuse woord vir “bedrieg” (akov) is.
| Afrikaans | Jakob | Hakskeen | Bedrieg |
| Hebreeus | Ya’akov | akev | akov |
| Verwysing | Gen 25:26 | Gen 27:36 |
Jakob se naam het dus nooit dieper betekenis gehad nie en daarom het God sy naam verander na “Israel” (Genesis 32:28) “want jy het teen God en teen mense ‘n stryd gevoer en jy het dit end-uit volgehou.” God het sy naam weer bevestig in Genesis 35:10.
Die naam “Israel” (Hebreeus = Yisra’el) beteken “stryder met God” of “God stry”. Dit kom van die Hebreeuse woorde “Yisra” (stry) en “El” (God).
Tydlyn
Jakob se tydlyn volgens The Annals of the World.
| Beskrywing | vC | Jakob ouderdom | Nota |
|---|---|---|---|
| Jakob word gebore toe Isak 60 jaar oud was | 1836 | 0 | Gen 25:26 |
| Abraham sterf toe hy 175 jaar oud was | 1821 | 15 | Gen 25:7-8 |
| Esau trou met Jehudit en Basemat, beide Hetiete | 1796 | 40 | 1 |
| Ismael sterf toe hy 137 jaar oud was | 1773 | 63 | Gen 25:17 |
| Isak seën Jakob toe hy 76+60=136 jaar oud is | 1760 | 76 | |
| God sluit ‘n verbond met Jakob by Bet-el | 1759 | 77 | Gen 28:10-22 |
| Esau trou met Magalat, dogter van Ismael | 1759 | 77 | Gen 28:8-9 |
| Jakob trou met Lea en Ragel | 1759 | 77 | 2 |
| Ruben, seun van Lea, word gebore | 1758 | 78 | |
| Simeon, seun van Lea, word gebore | 1757 | 79 | |
| Levi, seun van Lea, word gebore | 1756 | 80 | Gen 29:34 |
| Juda, seun van Lea, word gebore | 1755 | 81 | Gen 29:35 |
| Josef, seun van Ragel, word gebore. Werk nou 14 jaar vir Laban. |
1745 | 91 | 3 |
| Jakob vlug uit Haran nadat hy 20 jaar vir Laban gewerk het | 1739 | 97 | Gen 31:38,41 |
| Jakob veg met ‘n engel en sy naam word verander na Israel | 1739 | 97 | Gen 32 |
| Dina word verkrag deur Sigem | ? | ? | Gen 34 |
| Benjamin, seun van Ragel word gebore. Ragel sterf. | ? | ? | Gen 35 |
| Josef word as slaaf verkoop toe hy 17 jaar oud was | 1728 | 108 | Gen 37:2 |
| Josef lê die drome van die skinker en bakker uit. Dit gebeur twee jaar voor Josef in diens van die farao tree. | 1717 | 119 | Gen 41:1 |
| Isak sterf op 180 jarige ouderdom. | 1716 | 120 | Gen 35:28 |
| Josef lê farao se droom uit en tree in diens van die farao toe hy 30 jaar oud is. | 1715 | 121 | Gen 41:46 |
| Sewe jaar van hongersnood begin. | 1708 | 128 | |
| Eerste jaar van droogte. Jakob stuur sy seuns om koring te koop. | 1707 | 129 | |
| Tweede jaar van droogte. Jakob stuur weer sy seuns om koring te koop. Josef (30+7+2=39 jaar oud) sê wie hy is. Jakob en sy seuns trek na Egipte. Jakob sê vir die farao dat hy 130 jaar oud is. Dus verskil Jakob en Josef met 130-39=91 jaar | 1706 | 130 | Gen 47:9 |
| Jakob sterf toe hy 147 jaar oud is. Hy was 17 jaar in Egipte. | 1689 | 147 | Gen 47:28 |
Notas
- Gen 26:34-35. Net voor Jakob gevlug het na Haran spreek Rebekka haar misnoë uit oor Esau se Hetitiese vroue (Gen 27:46).
- Gen 29:14-. Hierdie datum is volgens James Ussher en neem aan dat Jakob met Lea en Ragel getrou het in dieselfde jaar wat hy hulle ontmoet het. Kyk Hoe oud was Jakob toe hy Ragel ontmoet het?
- Jakob was 91 jaar oud toe Josef gebore is en gevolglik 77 jaar oud toe hy Laban die eerste keer begin dien het. Dit kan afgelei word, want Jakob was 130 jaar oud toe hy die eerste keer voor Farao gestaan het in die tyd toe die sewe jare van oorvloed verby was en twee jaar van die hongersnood verby was. (Gen 45:6; Gen 47:9) Josef was toe 39 jaar oud. Hy was 30 jaar oud toe hy die eerste keer voor Farao gekom het, net voor die sewe jaar van oorvloed. (Gen 41:32,46)