Kyk ook KOMMENTAAR onderaan.

Nuusbrief – 1 Januarie 2025

Dit is met groot dankbaarheid dat die dagbestuur van Koinonia Sinode kan terugkyk na ‘n jaar waarin die Here gemeentes gedra en versorg het.

Koinonia sinode het begin met die Moreleta Beraad (MB), dit was ‘n eenmalige oop konferensie wat gehou was in reaksie op die AS se on-Skriftuurlike besluite. Tydens hierdie geleentheid is ‘n voortsettingskomitee aangewys om ‘n netwerk te vorm wat behoudende lidmate en gemeentes kan ondersteun. Die netwerk het later bekend gestaan as Kairos Netwerk (KN). As lojale lidmate het KN probeer om gesprek met die ASM te voer oor die krisis in die kerk. Op advies van die ATR het die ASM hierdie gesprekke gestaak. Die rede wat gegee was, is dat KN (volgens die ATR) geen locus standi het om met die ASM te praat nie.

Koinonia Sinode: KN het toe besluit om gemeentes wat getrou aan die Skrif wil wees, te nooi om deur geloofsbriewe amptelike afvaardiging na ‘n kerkvergadering te stuur. Op hierdie manier kon gemeentes, deur hul wettige afvaardiging amptelik vergader en op ‘n wettige wyse saam besin oor die pad vorentoe. So is die Koinonia Sinode (KS) gekonstitueer as ‘n amptelike kategoriale sinode van die NG-Kerk. Daar is ook ‘n taakspan benoem om opdragte uit te voer en tussentydse sake te hanteer. Die taakspanlede is aangewys uit dverskillende KS-gemeentes en staan bekend as die Koinonia Sinodale Diens-groep (KSDG).

Huidige stand van sake:  Ongeveer 100 gemeentes het ge-doleer. Verskeie gemeentes het besluit om ‘n stap verder te gaan en hul band amptelik op te skort met die Algemene Sinode en kerkvergaderings wat die AS se dwaling ondersteun deur nie meer hierdie vergaderings by te woon nie. Daar is ook ‘n paar gemeentes wat nog verder gegaan het deur hul bande te breek en het sodoende ‘n onafhanklike kerk geword.

KS se siening: Alhoewêl KS begrip het vir gemeentes wat heeltemal wegbreek, is dit nie in lyn met KS se aanbevelings nie. Gemeentes wat, na opskorting, nog ‘n stap verder wil gaan word aanbeveel om ‘n amptelike dispuut (‘n openbare geskil) met die AS te verklaar. Daar is reeds kerkrade wat besig is om hierdie roete te volg.

Heksejag en vervolging:  Intussen het die ASM en ATR ‘n skrywe na al die gemeentes en Ringe uitgestuur waarin hulle aangemoedig word om tugsake aan hande te maak teen leraars en kerkrade van gemeentes wat doleer of bande opskort. Die resultaat is dat daar tans, dwars oor die land, ‘n heksejag uitgevoer word op behoudende leraars en kerkrade. In meeste gevalle word hierdie ondersoeke onregverdig en onskriftuurlik hanteer wat tot gevolg het dat daar verskeie appélsake hangend is. Sommige daarvan sal moontlik in die arbeidshof of hoogeregshof gaan draai.

Ons Teologiese Taakspan is ook baie bedrywig met navorsing en voorbereidings om, sodra die tyd gereed is, met ons eie Teologiese opleiding te begin. Ons het, onder andere, ‘n aanbod gekry om ‘n bestaande Teologiese skool oor te neem maar na deeglike ondersoek is besef dat die tyd daarvoor nog nie reg is nie. Ons is nietemin bemoedig oor die GTA se pogings om in Februarie met klasse te begin en is dankbaar oor die getalle persone wat reeds geregistreer het.

Konferensie vir Skrifgetroue gemeentes in Maart 2025.

Daar word hard gewerk aan ‘n konferensie vir Maart 2025 om gemeentes aan te moedig om getrou te bly. Op 2:10 – Moenie bang wees vir wat julle alles gaan ly nie. Kyk, die duiwel gaan party van julle in die tronk laat gooi, sodat julle in beproewing sal kom, en julle sal tien dae lank baie swaar kry. Bly getrou tot die dood toe, en Ek sal julle die lewe as kroon gee. Die tema is: “Hoe lyk die wêreld en hoe lyk die kerk, in tye soos hierdie.”

Veel meer: Daar kan nog verder uitgebrei word oor die KSDG se aktiwiteite om kerkreformasie te bevorder deur voortgesette pogings tot mediasie, die suksesvolle konstituering van minstens twee Koinonia Ringe en 4 ander streekskonferensies. Ons  werk ook hard aan ons interkerklike verhoudinge met ander plaaslike gereformeerde denominasies. Daar is reeds verskeie baie positiewe samespreking gevoer met verteenwoordigers van hierdie denominasies. In die weke voor Kersfees was daar ook openhartige gesprekke met die leierskap van die RCA. Ons werk ook hard aan die formulering van ‘n spesifieke getuienis wat gemeentes sal kan onderskryf. Hierdie getuienis het alreeds samehorigheid in buitelandse gereformeerde kerke gebring.

Net om weer te bevestig:

Koinonia Sinode het van dag een af standpunt ingeneem teen kerkskeuring, ten gunste van kerkreformasie. Ons wil nie ‘n ander kerk stig nie maar, soos sout en lig, van binne reformeer. Koinonia Sinode skryf ook nie vir enige gemeente voor oor hoe om te doleer nie. Ons is egter bereid en beskikbaar om in ‘n adviserende hoedanigheid op te tree, indien ons vir daarvoor genader word. Die kerklike verval en deformasie het reeds so vêr gevorder dat dat daar geen kitsoplossings bestaan nie. Ons ondersoek en bespreek van tyd tot tyd opsies wat gemeentes kan oorweeg, maar kerkrade se reg om self oor hul pad vorentoe te besluit, word gerespekteer.

Gemeentes is van die begin af gewaarsku dat die pad van reformasie ‘n lang en moeisame pad is wat lojaliteit en volharding sal vra. Dit is die Here se kerk en Hy alleen sal die uitkoms bepaal. Ons taak is om openlik op te staan, standpunt in te neem en slegs die waarheid onbevrees te verkondig. Ons oë bly, tree vir tree, gerig op Jesus Christus. Hy is die enigste Leidsman en Voleinder van ons geloof is. Slegs Hy sal ook die uitkoms bepaal.

In die lig van bogenoemde is dit na ons  mening baie belangrik dat behoudende gemeentes in hierdie tyd sal saamstaan, hande vat en mekaar ondersteun. In hierdie stryd is daar nie plek om net blote kritiserende toeskouers te wees nie. Ons standpunt is dat elke gemeente, daar waar die Here hulle geplant het, moet getuig van en vir die waarheid. Slegs as ons hande vat en mekaar ondersteun kan daar iets van kom. Die Skrif sê:  “twee vaar beter as een en ‘n driedubbele tou word nie verbreek nie.” (Prediker 4:9).

Mag jul gemeente getrou wees aan die opdrag in 1 Tim 3:14-16 …

• ‘n gemeente wees van die lewende God, en
• draer en beskermer is van die waarheid.

Mooi wense vir die nuwe jaar.

Anton Knoetze

Namens KSDG

Kommentaar

Daniel Louw

Ek stem nie saam met KS se amptelike siening nie soos hierbo gegee nie:

Daar is ook ‘n paar gemeentes wat nog verder gegaan het deur hul bande te breek en het sodoende ‘n onafhanklike kerk geword. KS se siening: Alhoewêl KS begrip het vir gemeentes wat heeltemal wegbreek, is dit nie in lyn met KS se aanbevelings nie. Gemeentes wat, na opskorting, nog ‘n stap verder wil gaan word aanbeveel om ‘n amptelike dispuut (‘n openbare geskil) met die AS te verklaar. Daar is reeds kerkrade wat besig is om hierdie roete te volg.

(Tafelberg, Leeuwberg en Kestell is gemeentes wat nou onafhanklik is.)

‘n Dispuut sal niks oplewer nie. Dolering is waarskynlik selfs ‘n groter standpunt as ‘n dispuut en opskorting is natuurlik nog ‘n groter standpunt.

Ek weet nie wat dit help om by opskorting te stop nie. Dalk vir die korttermyn sodat lidmate in die gemeente gewoond raak aan die gedagte, maar op die ou einde moet opgeskorte gemeentes ook maar wegbreek, soos Tafelberg, Leeuwberg en Kestell.