In die volgende artikel pleit Gustav Claassen weer vir eenheid in plaas van ’n “skeuring”. Dit kom nadat die Kairos Netwerk verklaar het dat hulle ’n sinode van behoudende gemeentes wil skep.

Dit is egter baie maklik om vir eenheid te pleit as jy nie sterk standpunte oor kwessies het nie. Indien jy wel sterk standpunte het, is eenheid onmoontlik. Kyk ook Kerkeenheid.

********

Nuwe eenheidsmodel op die tafel om skeuring binne NG Kerk te vermy | Kerkbode

23 September 2021

Die NG Kerk soek ’n “eenheidsmodel waar diversiteit in die kerk gevier word en nie waar verdeeldheid bestuur moet word nie,” meen dr Gustav Claassen, algemene sekretaris van die NG Kerk.

Daardie soektog het vandeesweek verder lyf gekry toe die groep dolerende gemeentes binne die kerkverband die skep van ’n sinode van behoudende gemeentes in die vooruitsig gestel het. “(Ons bepleit) nie kerkskeuring nie, maar ware kerkreformasie (terug na die Woord en belydenisskrifte),” lui ’n verklaring wat gevolg het op ’n beplanningsvergadering wat die Sentrale Werkgroep van Kairos Netwerk (KN) op Maandag 20 September in Pretoria gehou het.

Claassen het op 23 September aan Kerkbode bevestig dat “moontlikhede vir ’n hergroepering van ringe en sinodes” iets is waarna óók die NG Kerk se leierskap tans kyk.

“Die Algemene Taakspan Regte (ATR) het opdrag gekry om moontlikhede in dié verband te ondersoek en is tans hieroor in gesprek met die leierskap van die Goudland Sinode,” aldus Claassen. “Metafore in die Bybel vir geloofsgemeenskappe wys telkens op die positiewe van diversiteit en dat dit tot die welwese van ’n geloofsgemeenskap is,” sê Claassen.

Die uitdaging vir die kerk is kennelik die feit dat KN en die sowat 80 dolerende gemeentes die einste strukture soos die Algemene Sinode (AS) bevraagteken. “Plaaslike gemeentes het geen direkte inspraak in die huidige AS van die NG Kerk nie. KN stel in die vooruitsig meerdere kerkvergaderings waar alle gemeentes direk verteenwoordiging sal geniet,” lui die KN-verklaring.

Die NG Kerk het sowat 1 094 gemeentes en 10 streeksinodes, wat Namibië insluit en geografies saamgestel is. Vanuit akademiese hoek was daar al stemme wat gesê het wat ’n mens glo – eerder as waar ’n mens woon – moet bepaal by watter streeksinode van die NG Kerk jy inval. Daar is soms groot teologiese afstand tussen naburige gemeentes en dit veroorsaak frustrasie “wat niemand help nie”, het prof Johan van der Merwe tydens ’n lesing by die onlangse Lentekonferensie gesê.

Die NG Kerk het trouens lank reeds ’n eerste stap in so ’n rigting gegee, het Van der Merwe met verwysing na die sogenaamde “stippellyngrense” gesê, wat sedert 1994 geld en waarvolgens lidmate self kan kies om by ander NG gemeentes in te skakel as bloot kaartgebonde voorskrifte. “Daar is g’n sin dat lidmate by enige gemeente kan inskakel maar ringe mag nie by ander sinodes inskakel nie,” meen Van der Merwe, wat kerkgeskiedenis en kerkreg aan die Universiteit van Pretoria doseer.

Die gevaar van ’n soort 11de sinode vir behoudendes is dadelik uitgewys. Die joernalis Neels Jackson het tydens die vraag-en-antwoord-deel van die Lentekonferensie-voorlegging gesê so ’n hergroepering sal moontlik die konflik in die NG Kerk “institusionaliseer”.

“As ons in 1986 of in 1990 (toe die kerk diep verdeeld was oor Kerk en samelewing) gemeentes en ringe en sinodes toegelaat het om volgens oortuiging te hergroepeer, waar sou dit die NG Kerk gelaat het? Sou ons nie die teologiese regverdiging van apartheid in party dele van die kerk geïnstitusionaliseer het nie?” wou Jackson weet.

Die spanning wat tans binne die kerk heers, draai veral om die AS se 2019-sinodebesluit oor selfdegeslagverbintenisse. Volgens die besluit erken die Algemene Sinode dat daar kerkrade en predikante is wat nie hulle weg oopsien om burgerlike verbintenisse tussen persone van dieselfde geslag te bevestig nie, asook kerkrade en predikante wat wel hulle weg oopsien om burgerlike verbintenisse tussen persone van dieselfde geslag te bevestig. “Die sinode wil graag die ruimte wat vir almal geskep word, om volgens hulle oortuiging op te tree, bevestig.”

KN verskil dus van die ruimte wat binne die NG Kerk bestaan. “Die AS se on-Bybelse besluite kan nie aan kerkrade oorgelaat word terwyl hul alreeds ’n taakspan vir implementering van bv. ’n nuwe formulier vir selfdegeslagverhoudings opgestel het nie,” lui die jongste KN-persverklaring.

********

PERSVERKLARING – 20 September 2021

Die Sentrale Werkgroep van Kairos Netwerk (KN), wat ook as KN se uitvoerende bestuur funksioneer, het op Maandag 20 September 2021 ‘n voldag beplanningsvergadering in Pretoria gehou.

Die feit is dat daar gedurende die laaste dekade twee duidelike strominge in die NG-kerk ontstaan het – liberaal en behoudend – en dat hierdie twee strominge besig is om ‘n groot verdeeldheid te veroorsaak. Dit is duidelik dat onlangse besluite van die NG-kerk lidmate in die steek gelaat het. Dit is die rede waarom al hoe meer NGgemeentes doleer.

Die groot getal beswaarskrifte van baie gemeentes wat aan die Algemene Sinode voorgelê is oor onBybelse besluitneming en ‘n onkerkordelike manipulerende werkswyse, is stil-stil onder die mat ingevee.

Hierdie werkswyse het gemeentes en lidmate in isolasie gelaat en hulle het spontaan by die KN asook die doleerstroom begin inskakel.

Kairos Netwerk het die volgende herbevestig:

1. Kerkeenheid is vir ons belangrik, maar as belydeniskerk glo ons eenheid kan slegs gevind word in liefde en waarheid.
2. Daarom bepleit ons nie kerkskeuring nie, maar ware kerkreformasie (terug na die Woord en Belydenisskrifte).
3. Die AS se on-Bybelse besluite kan nie aan kerkrade oorgelaat word terwyl hul alreeds ‘n taakspan vir implimentering van bv. ‘n nuwe formulier vir selfdegeslagverhoudings opgestel het nie.
4. Plaaslike gemeentes het geen direkte inspraak in die huidige AS van die NG kerk nie. KN stel in die vooruitsig meerdere kerkvergaderings waar alle gemeentes direk verteenwoordiging sal geniet.
5. KN het besluit om as hoë prioriteit saam met verskillende gespreksgenote te werk in die ondersoek na suiwer gereformeerde teologiese opleiding vir studente asook voortgesette opleiding vir leraars.
6. KN gaan voort met die beplanning van landswye byeenkomste en intussen word streke aangemoedig om in lyn met Covid beperkings kleiner streekskonferensies te hou.
7. Op voetspoor van Bethal en Namibië word DV ‘n streekskonferensie by die Strand Moedergemeente in die Wes-Kaap vir 23 Oktober beplan. Daar word soortgelyke konferensies in die vooruitsig gestel in Oktober in die Vrystaat (Odendaalsrus), Goudland (Vanderbijlpark) en die Oos Kaap.
8. Verder beywer Kairos Netwerk hom daarvoor om die AS se on-Bybelse besluite so gou moontlik amptelik herroep te kry. Alle behoudende gemeentes word aangemoedig om skriftelik daarop aan te dring.
9. Die vooruitsig tot die daarstelling van ‘n sinode van behoudende gemeentes.
10. Behoudende lidmate wat ons kommer deel, is welkom om KN by kairosnetwerk.net te kontak.

In KN se op pad wees vanaf waar ons nou is tot uiteindelik waar ons wil wees, beweeg ons volhardend:

• biddend in gehoorsaamheid aan die Woord en in afhanklikheid van die Here as die Hoof van sy
• Koninkryk en Kerk;
• soekend na die eer van die Here en die heil van sy kerk;
• gelowig in die Here wat (vir ons as mense) die onmoontlike kan laat gebeur; en met Christelike styl, liefde en waardigheid in ons optredes, woorde, aksies omdat ons in Christus Koninkryksburgers, sout en lig vir die wêreld is.

Ons kry gereeld navraag oor KN se oorsprong, doel en werkswyse en in die lig daarvan wil ons die media, die lidmate en alle belangstellendes verwys na KN se bekendstellingspamflet wat gratis afgelaai kan word by ons webwerf kairosnetwerk.net

Op die webwerf is ook ‘n reeks van vyf kort videos beskikbaar waarin KN se ontstaan, doel, werkswyse en visie vir die pad vorentoe verduidelik word.

Die Sentrale Werkgroep van Kairos Netwerk