**************

Past. Riekert kry pak oor anti-gay uitsprake | Rapport

Deur Johannes de Villiers

14 Januarie 2012

Hy is waarskynlik RSG se gewildste godsdiensaanbieder, een wat met sy vriendelike stem en vrolike laggie in die hart van talle luisteraars ingekruip het.

Maar die afgelope week was die stem van past. Riekert Botha, aanbieder van Pleisters vir die siel op Saterdagoggende, veel minder vrolik.

“Sjoe, dit was nie vir my ’n lekker week nie,” het Botha gesê toe Rapport hom bel.

Dié pastoor is in die middelpunt van ’n storm nadat verskeie teoloë, predikante en ander mense geëis het dat RSG hom van die lug verwyder.

Dié kritici beskuldig Botha van fundamentalisme en haatspraak nadat hy op sy Facebook-aanhangersblad anti-gay-uitsprake gemaak het.

“Baie mense was krenkend teenoor my,” sê ’n ongelukkige Botha. “Ek het nog nooit soveel beledigings gehoor nie.”

Die storm om die Pleisters-pastoor, wat ook by die Vredendal Baptistegemeente werk en ’n paar boeke met oordenkings agter sy naam het, het opgesteek nadat hy op sy Facebook-blad geskryf het: “Dis ‘in’ om gay te wees en die Bybel as outyds te beskou … By God is ‘in’ baie, baie ‘uit’. Jy moet kies: ‘in’ by God en ‘uit’ by die mense of andersom.”

Later het Botha geskryf: “Ek glo dat homoseksualisme sonde is – soos die Skrif sê. Ek glo nie dat om iets sonde te noem, beteken om iemand te veroordeel nie.”

Talle van Botha se ondersteuners het ook die laaste paar dae anti-gay- boodskappe op dié Facebook-blad geplaas – selfs een wat homoseksualiteit ’n eienskap van die Antichris genoem het.

Botha se Facebook-aanhangersblad heet soos sy RSG-insetsel “Pleisters vir die siel”.

Een van die eerste mense wat Botha aangevat het, was die teoloog dr. Ralph Barnard, ’n voormalige RSG-aanbieder, wat wou weet: “Wat doen ’n fundamentalis soos Riekert Botha op RSG?” Volgens Barnard het hy RSG twee jaar gelede gewaarsku dat Botha voorgee om “absolute kennis” oor God te hê.

Kort daarna het onder andere Jean Oosthuizen, nuusredakteur van Kerkbode, toegetree. Oosthuizen het gekla Botha se Facebook-blad lyk na “die Demoondoom se blad met ’n suikerstropie oor”. (Die “Demoondoom” is ’n verwysing na ds. Pieter Fourie van Krugersdorp wat verlede jaar in die nuus was oor sy Facebook-blad waar beskuldigings van sonde en duiwelbesetenheid rojaal uitgedeel is.)

Van die kritici, onder wie ’n ouer van ’n gay kind, het briewe aan RSG gestuur om te eis dat Botha van die lug verwyder word.

In ’n brief wat mnr. Cobus Fourie van die organisasie South African Gay & Lesbian Association Against Defamation aan RSG en die Uitsaaiklagtekommissie gestuur het, skryf hy dit is “bejammerenswaardig dat ’n openbaar gefinansierde radio­stasie ’n platform verskaf aan ’n persoon wat onvanpaste en onsensitiewe aanmerkings maak”.

Botha se teenwoordigheid op RSG lyk na ’n implisiete goedkeuring van sy sienings deur die radiostasie, skryf Fourie.

Botha self sê hy staan by sy sienings, maar is spyt as hy enigiemand seergemaak het. “Wat ek sê, suig ek nie uit my duim uit nie. Ek kry dit in die Bybel.”

Hy het intussen besluit om die Pleisters-Facebookblad te sluit, want hy is “verleë en besorg oor die mense in albei kampe se uitlatings en benadering”.

Een van die boodskappe wat hom die meeste ontstel het, was van iemand wat geskryf het: “Jou dae by RSG is getel, jou homofobiese idioot.” [Kommentaar: Politieke ontleder, Piet Croucamp, het ook die volgende opmerking oor Riekert gemaak op Jean Oosthuizen se facebook muur: “Ek hoop RSG raak nou ontslae van die useless, pseudo-intellektuele voorvel.”]

Ná dié boodskap het hy RSG se stasiebestuurder, me. Magdaleen Kruger, gebel om te hoor of hy nog ’n toekoms op die lug het.

Kruger het aan R apport geskryf hulle respekteer Botha se spraakvryheid. “As deel van die insetsel Pleisters vir die siel, Saterdae op Brêkfis met Derrich, het sy inhoud RSG nog geen rede gegee om op te tree nie,” sê Kruger.