Kyk ook KOMMENTAAR onderaan.

*****

Kairos Netwerk oor leertugondersoek by Kweekskool op Stellenbosch

12 Januarie 2023

’n Teologiese dosent van die NG Kerk by Universiteit Stellenbosch, dr Peter Nagel, is onlangs aan drie klagtes van leerdwaling skuldig bevind. Hy aanvaar nie die Godheid van Jesus nie. In Rapport van 8 Januarie beweer hy dat die tugondersoek bedoel was om behoudendes te paai – die kerkmense het hom “teologies verkrag”, want die artikel waarin hy die Godheid van Jesus ontken, “Problematising the Divinity of Jesus: Why Jesus is not θεός”, is al in 2019 gepubliseer. Vier jaar later het die dagbestuur van Wes-Kaapland se kuratorium het hierop geantwoord met ’n persverklaring in Kerkbode.

Kairos Netwerk wil kortliks reageer. Ons is dankbaar dat daar na jare se klagtes uiteindelik besluit is om ’n tugondersoek te doen oor ’n dosent se leerstellige dwalinge. Wat die kuratorium se motivering vir hierdie ondersoek was, weet ons nie. Ons bid net dat dit die begin sal wees van ’n skoonmaakproses om ons predikante se opleiding weer op ’n Skriftuurlike teologiese basis te plaas. Die kuratorium se verklaring bevestig egter ’n paar groter probleme:

1. Ons is oortuig dat beide die kuratorium en die ring die erns van hierdie dwaling onderskat. As ’n dosent wat predikante moet oplei, openlik die Godheid van Jesus ontken, oortree hy nie maar net sy legitimasie-eed nie, hy verwerp die hart van die evangelie en die fondament van al die Christelike kerke van meer as tweeduisend jaar. So ’n dwaling vra nie net ’n akademiese herformulering nie maar radikale bekering.
2. Ons is verder oortuig dat die tugmaatreël nie naastenby voldoen aan die doel van kerklike tug, naamlik die eer van God, die welsyn van die kerk en die redding van die sondaar, nie. Dit is tog sinneloos om vir ’n dosent te sê jy mag nie meer Sondae preek nie, want jy verkondig dwaalleer, maar jy kan steeds elke dag van die week klas gee vir die kerk se voornemende predikante. Wat word dan van die eer van God en die welsyn van die kerk?
3. Ons is oortuig dat die kuratorium hulle eie plig versuim deur te maak asof hulle niks verder kan doen nie aangesien die universiteit sy werkgewer is. Daarteenoor bepaal KO Reglement 11 (3.3.8) duidelik oor die bevoegdheid van die kuratorium se ondersoekliggaam.

4. Die kuratorium erken nou amptelik dat Kairos Netwerk tog al die tyd reg was oor die ernstige leerdwaling by die teologiese fakulteite. Daar is dosente met ernstige teologiese dwalinge wat steeds toegelaat word om ons toekomstige predikante op te lei.

As ’n kuratorium met sulke swak verskonings hulle plig versuim om toesig te hou oor teologiese opleiding, verbeur hulle hulle bestaansreg.

Geteken

Anton Knoetze

Namens Kairos Netwerk bestuur

Kommentaar

Daniel Louw

‘n Mens wonder of die Kerkorde Reglement 11 (3.3.8) meer as akademiese waarde het. Dit sou kon werk indien daar enkele dosente was wat ‘n problematiese teologiese siening gehad het, maar die feit is dat die oorgrote meerderheid teologiese dosente ‘n (erg) liberale siening het. Kyk Lys van teoloë wat liberale uitsprake gemaak het. Sou die Kerkorde dus toegepas word, sou dit beteken dat die meerderheid teologiese dosente nie NGK teologiese studente kon oplei nie.

Ten spyte hiervan word die teologiese fakulteite deur promentente mense in die NG Kerk ondersteun:

In ‘n onderhoud met ds. Dubois du Toit van Namibië op 7 September 2021 het dr. Frederick Marais, voorsitter van die algemene kuratorium, die drie teologiese fakulteite (Stellenbosch, Pretoria en Bloemfontein) sterk verdedig. Hy het dit weer in ‘n video op 26 Oktober 2021 gedoen.

Ook het die Noordelike Sinode in Oktober 2022 hulle waardering uitgespreek vir die “goeie werk” wat by die teologiese fakulteit van die Universiteit van Pretoria gedoen word. Daar is egter nie wesenlike verskille tussen die teologiese sieninge van die drie fakulteite nie (kyk Hoe NGK teologiese fakulteite hulself adverteer), dus sou ‘n mens kon aanvaar dat hierdie waardering ook vir die ander twee teologiese fakulteite geld.