Kyk ook:
- Johan Janse van Rensburg
- Om tot geldige vertolkings van die Skrif in ons tyd te kom (Fanie Cronjé, 3 Aug 2022)
- Herinterpretasie niks nuuts nie (Louis Jonker, 18 Aug 2022)
*******
Skrif: Die verskil tussen eietydse interpretasie en eietydse toepassing | Kerkbode
Kerkbode
16 Augustus 2022
Prof Johan Janse van Rensburg skryf: Die rubriek van dr Fanie Cronjé (3 Augustus 2022) verwys. Om tot ’n geldige vertolking van die Bybel te kom, gebruik broer Cronjé die instrument van eietydse interpretasie om die huidige trant van Skrifverduistering te regverdig. Kortliks die volgende:
- Daar is ’n groot verskil tussen ’n eietydse interpretasie en ’n eietydse toepassing van die Skrif. Wanneer interpretasie die oorspronklike betekenis van die teks verander, mag dit eenvoudig nie as hermeneutiese beginsel gebruik word nie. Dit is presies wat die Algemene Sinode gedoen het toe hulle besluit het dat die Skrif nie selfdegeslag-verhoudings veroordeel nie (Levitikus 18-20; Romeine 1; 1 Korintiërs 6:9); dat daar nie ’n duiwel is nie (1 Petrus 5:8; Efesiërs 6:10) en dat kindertjies nagmaal mag gebruik al begryp hulle nie wat die betekenis van wyn en brood is nie (1 Korintiërs 11:27-29).
- ’n Eietydse toepassing beteken dat die oorspronklike betekenis van die teks in ’n nuwe tyd en konteks verreken word. Die gelykenis van die Barmhartige Samaritaan is byvoorbeeld steeds geldig as illustrasie van barmhartigheid. Dit is egter nie moontlik om vandag in ’n krimineel-geteisterde Suid-Afrika te gaan kyk of die persoon wat in die pad lê, hulp nodig het nie. Die toepassing word in ’n nuwe konteks verreken terwyl die betekenis na die oorspronklike bedoeling behou word.
- Om iemand soos Calvyn te gebruik om die nuwe verstaan van die Skrif te regverdig, gaan nie op nie. Wie Calvyn se Institusie en sy kommentare lees, sal nooit tot die gevolgtrekking kan kom dat hy die Skrif anders as die oorspronklike bedoeling van die teks uitgelê het nie. Laat ons asseblief ophou om Calvyn te gebruik as die oorsaak van alles wat verkeerd is in die kerk of om alles waarvoor regverdiging gesoek word, aan Calvyn te ontleen.
- Dit is ’n algemene beginsel dat die teks van historiese dokumente nie verander mag word nie. Daar is ’n rede waarom Openbaring 22:18-19 waarsku dat niks aan die woorde van “hierdie boek” weggelaat of daaraan toegevoeg mag word nie.